छत्तीसगढ़ म चुनाई होय हे बहुमत म ये पइत भाजपा ला सत्ता सुख मिले हवय. जल्द ही छत्तीसगढ़ म नवा सरकार बन जाहि.. शपथ लेहे जाहि. ये पइत नवा मुख्यमंत्री ले छत्तीसगढी भाषा म शपथ लेहे के भयंकर मांग सोशल मिडिया ले लेके सबे जगा उपजत हे.
आठवीं अनुसूची म शामिल रहय जरूरी नइ — पिछले पइत मुख्यमंत्री भूपेश बनिस ता ओहर छत्तीसगढी भाषा म शपथ लेना चाहत रहिस. फेर राजभवन के अधिकारी मन आठवीं अनुसूची म शामिल नइ होय के बात कही दिस ओकर बाद शपथ हिंदी म होइस..
आठवीं अनुसूची रोड़ा नइ – एम ए छत्तीसगढी छात्र संगठन के अध्यक्ष ऋतुराज साहू के कहना हे कि राज्य म शपथ लेहे बर भाषा बंधन नइ हो सकय. अगर असना होतिस ता अंग्रेजी घलो आठवीं अनुसूची म नइ हे कइसे शपथ एमा होथे.2018 म मिजोरम जे मुख्य्मंत्री जोराम थामाँ ह मिजो म शपथ ले रहिस वहु आठवीं अनुसूची म नइ हे. ता फेर छत्तीसगढी म शपथ काबर नइ हो सकही. जबकि छत्तीसगढी ला तो राजभाषा के दर्जा घलो मिले हवय.
क़ानून के हिसाब ले – छत्तीसगढी म कहा लिखाये हे कि कोन जगा एमा शपथ लेहे जाहि या फेर कहा नइ लेहे जाहि. ज़ब लिखाय ये दुनो जिनिस नइ हे ता क़ानून के हिसाब ले घलो छत्तीसगढ़ी म शपथ लेहे म कोनो अड़चन नइ हे.
इतिहास म लिखा जाहि नाव -अगर ये पइत के मुख्यमंत्री अउ मंत्री मन छत्तीसगढ़ी म शपथ कही लिहि ता इतिहास म ओमन के नाव लिखें जाहि काबर कि राज्य बने के 23 बछर बाद भी अब तक कोनो मुखिया छत्तीसगढ़ी म शपथ नइ लेहे..
एम ए छत्तीसगढ़ी छात्र संगठन ह करे हे गोहार – छत्तीसगढ़ी म लेवय नवा मुखिया अउ मंत्री मंडल शपथ एकर बर एम ए छत्तीसगढ़ी छात्र संगठन ह राज्यपाल, प्रधानमंत्री, राज्य प्रसासन ले गोहार करे हे संग म गियापन घलो दे हे. संग म सोसल मिडिया म घलो केमेपिंग करे हे ताकि हमर भाषा ला सही राजभाषा अउ उचित मान सम्मान मिलय.
